Престианни дисквалификацияга қарамай «Сантьяго Бернабеу»га боради
Ирқчиликда айбланиб, УЕФА томонидан вақтинча четлатилган «Бенфика» яримҳимоячиси Жанлука Престианни «Реал Мадрид»га қарши жавоб учрашувини стадиондан кузатиб боради. AS нашрининг хабар беришича, аргентиналик футболчи ўз жамоасини қўллаб-қувватлаш учун Мадридга йўл олган.
Престианнининг «Сантьяго Бернабеу» стадионида бўлиши хавфсизлик хизмати томонидан қўшимча чораларни талаб қилиши мумкин. Чунки биринчи ўйинда Винисиус Жуниор ва Престианни ўртасида юзага келган можаро сабабли мухлислар орасида кескинлик юқори.
УЕФА ҳозирда ушбу ҳолат бўйича суриштирув ишларини давом эттирмоқда. Престианни Винисиусни ҳақорат қилмаганини таъкидлаётган бўлса-да, ташкилот барча аудио ва видео материалларни ўрганиб чиқмоқда. Айни дамда футболчи ўйиндан четлатилган, бироқ унинг стадионга киришига расмий тақиқ йўқ.
