Престианни: «Айбловлар мутлақо асоссиз. Юзага келган вазият фаолиятимга жуда салбий таъсир кўрсатди»
«Бенфика» яримҳимоячиси Жанлука Престианни Чемпионлар Лигаси доирасидаги «Реал Мадрид»га қарши ўйинда Винисиус Жуниор томонидан билдирилган ирқчилик айбловларига илк бор расмий муносабат билдирди.
Эслатиб ўтамиз, «қироллик клуби»нинг 1:0 ҳисобидаги ғалабаси билан якунланган баҳсда Винисиус учрашув бош ҳаками Франсуа Летексье билан суҳбатда аргентиналик футболчи уни «маймун» деб ҳақоратлаганини даъво қилган эди. Ўша вазиятда Престианни оғзини футболка билан ёпиб олгани сабабли, унинг нима деганини аниқ тушуниш имкони бўлмаган.
Record нашрининг хабар беришича, Престианни машғулотдан сўнг жамоадошлари билан учрашиб, ўйиндан кейин юзага келган катта шов-шув ва клуб обрўсига етган путур учун узр сўраган. Бироқ, у бразилиялик футболчини ирқий камситувчи сўзлар билан ҳақорат қилганини қатъиян рад этган.
«Бу айбловлар мутлақо асоссиз. Юзага келган вазият ҳам профессионал фаолиятимга, ҳам шахсий ҳаётимга жуда салбий таъсир кўрсатди», — дея таъкидлаган «Бенфика» аъзоси.
Айни дамда УЕФА ушбу ҳолат бўйича расмий суриштирув ишларини бошлаган. Агар футболчининг айби исботланса, уни узоқ муддатли дисквалификация кутиши мумкин.
