Португалиялик мухлислар Роналдунинг терма жамоага қайтишига қарши
Португалиянинг A Bola нашри ўтказган сўровномада иштирок этган мухлисларнинг аксарияти Криштиану Роналдунинг бош мураббий Жорже Жезуш билан юзага келган можародан сўнг миллий терма жамоага қайтишига қарши чиқди.
Овоз беришда 25 мингдан ортиқ ўқувчи иштирок этган. Респондентларнинг 70 фоиздан зиёди 41 ёшли ҳужумчи энди Португалия терма жамоаси сафида ўйнамаслиги керак, деган фикрни билдирган.
Қарийб 14 фоиз иштирокчи яқин кунларда можарони ҳал қилиш мумкин, деб ҳисоблаган. Тахминан 7 фоиз респондент эса Роналду футболчи ва бош мураббий вазифаларини бир вақтда бажаришини таклиф қилган. Яна 6 фоиз иштирокчи Жезуш берган ваъдасида турмаганини таъкидлаб, можаро иштирокчиларидан фақат бири терма жамоада ишлашда давом этиши мумкин, деган позицияни қўллаб-қувватлаган.
Эслатиб ўтамиз, 6 октябрь куни Роналду миллий терма жамоа йиғинини тарк этгани учун мухлислардан очиқчасига узр сўраган эди. Шу билан бирга, португалиялик футболчи Жезушни унга берган ваъдаларини икки марта бузганликда айблаган.
