Португалия футбол федерацияси Роналду билан ярашишга ҳаракат қилмоқда
Португалия футбол федерацияси Криштиану Роналду билан юзага келган вазиятни юмшатиш ва миллий жамоа сардорини терма жамоада олиб қолиш устида ишламоқда. Marca маълумотига кўра, федерация раҳбарияти 41 ёшли ҳужумчи сўнгги воқеалардан кейин терма жамоадаги фаолиятини якунламаслигига умид қилмоқда.
Роналду бош мураббий Жорже Жезуш билан боғлиқ можаро ортынан Португалия терма жамоаси қароргоҳини муддатидан олдин тарк этган эди. Футболчи бу қарорни федерация президенти Педро Проенса билан суҳбатдан кейин қабул қилганини билдириб, кетишининг ҳақиқий сабабларини кейинроқ португалияликларга тушунтиришини маълум қилган.
Португалия матбуотида ушбу вазиятдан кейин Роналду миллий жамоадаги фаолиятини якунлаши мумкинлиги ҳақидаги хабарлар ҳам тарқалди. Бироқ федерация ҳозирча бундай сценарийнинг олдини олиш ва томонлар ўртасидаги муносабатларни тиклашга ҳаракат қилмоқда. Шу билан бирга, Жезуш Дания устидан қозонилган 4:2 ҳисобидаги ғалабадан кейин Роналду билан боғлиқ саволларга батафсил жавоб беришдан бош тортди.
Маълумот учун, Криштиану Роналду Португалия терма жамоаси тарихидаги энг кўп ўйин ўтказган ва энг кўп гол урган футболчи ҳисобланади. У миллий жамоа сафида 234 та учрашувда майдонга тушиб, 146 та гол муаллифи бўлган. Ҳозирча футболчининг Португалия термасидаги келажаги бўйича якуний қарор эълон қилинмаган.
