Польшалик футболчи кийик билан тўқнашувдан сўнг автоҳалокатда вафот этди
Польшанинг “Kania Gostyń” клуби ҳимоячиси Оскар Кордус 20 ёшида автоҳалокат оқибатида вафот этди. Футболчининг ўлими ҳақида унинг клуби расман маълум қилди.
Ҳодиса 21-сентябрь куни эрталаб Гостинь шаҳри яқинидаги DW434 автомобиль йўлида содир бўлган. Қарама-қарши йўналишда ҳаракатланаётган Volkswagen йўлга чиққан кийикни уриб юборган ва зарба оқибатида ҳайвон Кордус бошқараётган BMW автомобилининг олд ойнасига келиб урилган. Шундан сўнг автомобиль йўлдан чиқиб, ағдарилиб кетган.
Воқеа жойига етиб келган қутқарувчилар Кордусда ҳаёт белгиларини аниқламаган ва дарҳол реанимация ишларини бошлаган. Унинг юрак фаолияти қайта тиклангач, футболчи вертолётда Познандаги шифохонага олиб кетилган, бироқ шифокорлар унинг ҳаётини сақлаб қола олмаган.
Маълумот учун, Оскар Кордус жорий мавсум олдидан “Корона Пяски”дан “Kania Gostyń”га ўтган эди. У аввалроқ “Заглембе Любин” академияси ҳамда “Варта Познань” тизимида ҳам фаолият олиб борган.
