Погба «Манчестер Юнайтед»га иккита чемпионлик берилишига умид қилмоқда
«Манчестер Юнайтед»нинг собиқ ярим ҳимоячиси Пол Погба «Манчестер Сити»нинг молиявий қоидабузарликлари билан боғлиқ можарога муносабат билдирди. Франциялик футболчи собиқ жамоаси Англия Премьер-лигасининг иккита чемпионлик унвонини қўлга киритишга умид билдирди. Бу ҳақда Foot Mercato нашри хабар бермоқда.
Манбага кўра, Сингапурдаги Формула-1 Гран-присида иштирок этган Погбадан «Манчестер Сити» атрофидаги можаро ҳақида сўрашган. Футболчи бунга ҳазил аралаш жавоб қайтарган: «Ростини айтсам, бу борада айтадиган гапим йўқ. Умид қиламанки, бу ҳолат Премьер-лигага таъсир қилмайди ва биз иккита чемпионликни қайтариб оламиз».
Погба 2017/18 ва 2020/21-йилги мавсумларни назарда тутган. Ўша йилларда «Манчестер Юнайтед» АПЛда «Манчестер Сити»дан кейин иккинчи ўринни эгаллаган эди. Айни пайтда «шаҳарликлар» молиявий қоидабузарликлар билан боғлиқ 114 та ҳолат бўйича айбдор деб топилган. Клуб қарор устидан апелляция берган, якуний жазо эса ҳозирча белгиланмаган.
Маълумот учун, Погба 2016–2022-йиллар давомида «Манчестер Юнайтед» сафида тўп сурган ва ушбу даврда Англия чемпионлигини қўлга кирита олмаган. Агар «Манчестер Сити» айрим чемпионлик унвонларидан маҳрум қилинса ҳам, совринлар автоматик тарзда иккинчи ўринни эгаллаган жамоаларга берилиши кафолатланмаган.
