Почеттино: “Тоттенҳэм”га 2016/17 йилги АПЛ чемпионлиги берилиши керак”
“Тоттенҳэм”нинг собиқ бош мураббийи Маурисио Почеттино Лондон клубига 2016/17 йилги Англия Премьер-лигаси чемпионлиги берилиши кераклигини айтди. Аргентиналик мутахассис бунга ўша мавсум чемпиони “Челси”нинг молиявий қоидабузарликлари аниқланганини сабаб қилиб кўрсатди.
“Челси” тарихий молиявий қоидабузарликлар сабаб 2026 йил март ойида Премьер-лига томонидан 10,75 миллион фунт жаримага тортилганди. Текширув давомида 2011–2018 йиллар оралиғида футболчилар, рўйхатдан ўтмаган агентлар ва бошқа учинчи томонларга ошкор қилинмаган тўловлар амалга оширилгани аниқланган.
Почеттинонинг фикрича, бундай ҳолатда чемпионлик ўша мавсум иккинчи ўринни эгаллаган жамоага берилиши керак. 2016/17 йилги мавсумда Антонио Конте бошчилигидаги “Челси” 93 очко билан чемпион бўлган, Почеттинонинг “Тоттенҳэм”и эса клуб рекорди бўлган 86 очко билан иккинчи ўринни эгаллаган.
Маълумот учун, “Тоттенҳэм” Англия олий дивизионида сўнгги бор 1960/61 йилги мавсумда чемпион бўлган. Почеттино эса ҳозирда АҚШ терма жамоасини бошқармоқда.
