Почеттино «Реал» бош мураббийига айланиши мумкин — ESPN
Мадриднинг «Реал» клуби раҳбарияти келгуси мавсум учун мураббийлар штабини ўзгартишни режалаштирмоқда. ESPN хабарига кўра, клуб президенти Флорентино Перес янги спорт лойиҳасини амалга ошириш учун номзодлар рўйхатини шакллантирган бўлиб, унда аргентиналик мутахассис Маурисио Почеттино ҳам мавжуд.
Айни пайтда Почеттино АҚШ миллий жамоасини бошқармоқда. Перес ушбу мураббийнинг иш услуби ва тактик қарашларини юқори баҳолайди, бу эса уни «Реал»даги янги лойиҳа учун асосий даъвогарлардан бирига айлантирмоқда.
Эслатиб ўтамиз, «Реал»нинг амалдаги бош мураббийи Альваро Арбелоа жорий йилнинг 12 январь куни Хаби Алонсо кетганидан сўнг ушбу лавозимга тайинланган эди. Арбелоа қўл остида мадридликлар Испания чемпионатининг 27 туридан сўнг 63 очко билан турнир жадвалида иккинчи ўринда бормоқда. Айни пайтда жамоа пешқадам «Барселона»дан тўрт очко ортда қолмоқда.
Клуб раҳбарияти яқин ойлар ичида якуний қарорга келишини кутмоқда.
