Пирс Морган Жорже Жезушни Роналдуга ҳурматсизликда айблади
Британиялик журналист Пирс Морган Португалия терма жамоаси бош мураббийи Жорже Жезушни Криштиану Роналду билан боғлиқ вазият сабаб кескин танқид қилди. Морган португалиялик мутахассисни Эрик тен Хаг билан қиёслаб, у Роналдуни камситишга уринаётганини таъкидлади. Бу ҳақда The News International нашри хабар бермоқда.
Манбага кўра, Морган ижтимоий тармоқдаги саҳифасида Жезушни “португалиялик тен Хаг” деб атаган ва мураббийни Роналдуга нисбатан очиқ ҳурматсизликда айблаган. Журналист, шунингдек, вазиятга яна қайтишини ва Жезушнинг хатти-ҳаракатларини алоҳида муҳокама қилишини билдирган.
Можаро Роналду Португалиянинг Норвегияга қарши учрашувини тўлиқ заҳирада ўтказганидан кейин кучайди. Кейинчалик Жорже Жезуш Данияга қарши баҳсда ҳам 41 ёшли ҳужумчини асосий таркибга киритмаслигини маълум қилди. Шундан сўнг Роналду терма жамоа қароргоҳини тарк этди. Португалия футбол федерацияси ва Жезуш эса кейинчалик футболчининг миллий жамоага қайтиши учун эшик очиқ эканини билдирди.
Маълумот учун, Криштиану Роналду Португалия терма жамоаси сафида 234 та учрашув ўтказиб, 146 та гол урган. У миллий жамоа тарихида ҳам ўйинлар сони, ҳам урилган голлар бўйича рекордчи ҳисобланади.
