Пике “Реал”нинг ҳакамлар ҳақидаги шикоятларига жавоб қайтарди
“Барселона”нинг собиқ ҳимоячиси Жерар Пике Мадриднинг “Реал” клуби ва унинг мухлислари томонидан ҳакамлик мавзуси тез-тез кўтарилишига муносабат билдирди. Ижтимоий тармоқ фойдаланувчиларидан бири “Барселона”нинг муваффақиятларини ҳакамлар ёрдами билан боғлагач, испаниялик собиқ футболчи унга жавоб қайтарди.
“‘Реал’ мухлислари, сиз доим ҳакамлик ҳақида гапирасиз, аммо Чемпионлар Лигаси финалларини эслатишга мажбур қилманг”, — деди Пике. Унинг фикрича, футбол тарихида ҳакамларнинг хатолари кўп кузатилган, бироқ бундай вазиятлар кўпроқ “Реал” фойдасига ишлаган.
Пике ўз фикрига мисол сифатида “Реал”нинг “Ювентус”га қарши Чемпионлар Лигаси финалидаги Предраг Миятович голини, шунингдек, “Атлетико”га қарши финалда Серхио Рамос томонидан киритилган голни эслатди. Собиқ ҳимоячи мазкур вазиятларда голлар нотўғри ҳисобланганини таъкидлади.
Маълумот учун, Жерар Пике футболчилик фаолиятининг асосий қисмини “Барселона”да ўтказган. Испаниялик собиқ ҳимоячи каталонияликлар сафида тўрт марта Чемпионлар Лигаси ғолибига айланган ва фаолияти давомида “Реал” билан кечган кўплаб “Эль-Класико” учрашувларида иштирок этган.
