Перес: «Кўрсаткичлар яна юқори бўлиши мумкин эди. Мингга яқин овоз бекор қилинди»
«Реал Мадрид» президенти Флорентино Перес 2026 йил 7-июн куни бўлиб ўтган клуб президенти сайловлари якунлари бўйича ўз фикрларини билдирди.
«Биз барча сайлов участкасида ғалаба қозондик ва клуб тарихи учун иккинчи энг яхши натижани қайд этдик.
Рекорд натижани 2004 йилда ўрнатган эдик. Шуни айтишим керакки, кўрсаткичлар янада юқори бўлиши мумкин эди, чунки почтадан келган мингга яқин овоз бекор қилинди.
Нотариус томонидан тасдиқланган ушбу овозлар процессуал қоидабузарликлар сабабли ҳисобга олинмади. Биз ушбу қарор устидан шикоят қиламиз, чунки ҳақлигимизга ишончимиз комил», — дея Переснинг сўзларини келтирмоқда клуб расмий сайти.
Сайлов якунларига кўра, 79 ёшли Перес ўз рақиби, испаниялик тадбиркор Энрике Рикелмени ортда қолдириб, 2030 йилгача клубни бошқаришда давом этадиган бўлди. Перес «Реал» президенти лавозимини кетма-кет саккизинчи марта эгалламоқда.
