Педру Нету “Арсенал”га қарши ўйиндаги номақбул хатти-ҳаракатлари учун айбланмоқда
Англия футбол ассоциацияси (FA) “Челси” ҳужумчиси Педру Нетуни Англия чемпионатининг 28-туридан ўрин олган “Арсенал”га қарши ўйинда (2:1) ўзини нотўғри тутаётганликда айблади.
Ташкилотнинг ижтимоий тармоқдаги расмий саҳифасида қайд этилишича, футболчи қизил карточка олганидан сўнг майдонни белгиланган вақтда тарк этмаган ҳамда учрашув расмийларига нисбатан ҳақоратли сўзларни ишлатган.
Педру Нетуга юзага келган вазият бўйича тушунтириш бериш учун жорий йилнинг 9-март, душанба кунига қадар муҳлат берилди.
Эслатиб ўтамиз, “Челси” вингери баҳснинг 67-дақиқасида дастлабки сариқ карточкасини қабул қилиб олган, орадан уч дақиқа ўтиб эса иккинчи огоҳлантириш сабаб майдондан четлатилганди. Мазкур учрашувда португалиялик футболчи самарали ҳаракатлари билан ажралиб тура олмади.
