Педро Морейра: “Имкониятларимиз кўп бўлди, фарқли томони рақиб вазиятларидан фойдаланиб кетди”
“Пахтакор” – “Андижон” (2:3) ўйинидан кейинги матбуот анжуманида мезбонлар бош мураббийи Педро Морейра қатнашди.
- Ўйинимиз бироз қийин кечди. Учрашув давомида ташаббусга эришишга ҳаракат қилдик. Биринчи бўлимда яхши ўйин кўрсатаётгандик. Биринчи голни ўтказганимиздан кейин ўйинга ўзгартиришлар киритишга ҳаракат қилдик. Олдинга ўтишга интилдик. Бироқ стандарт вазиятлардан гол ўтказиб юбордик. Шогирдларим ўзларининг маҳоратини кўрсатишди. Улар охиригача курашишди. Бироқ бундай натижа бўлмаслиги керак эди.
- Ғалаба қозониш учун вазият яратиш керак. “Пахтакор” биргина “Машъал” билан ўйинда кучли тарафларини кўрсата олди. Қолган учрашувларда эса ўз даражасида етарлича имкониятлар ярата олмаяпти. Ваҳоланки, ўйинчилар ҳужумкор ўйнай оладилар. Бу нима билан боғлиқ?
- Бизга қарши ҳамма жамоалар кутиб ўйнашади. Дарвозага яқин жойда футболчилари кўп бўлади. Шунинг учун кутишга, уларга қийинчилик туғдиришга ҳаракат қиламиз. Лекин бугун ўйин давомида анча яхши ҳаракат қилдик, аммо натижа бўлмади. Биринчи бўлимда 2-3 та имкониятимиз бўлди. Ҳатто, дарвозага кириб кетаётган тўпни ҳимоячи қайтариб юборди. Гол ўтказгандан кейин таваккалчиликка ўтишга мажбур бўлдик. Улар стандартдан имкони борича фойдаланиб кетишди.
- “Андижон” клуби ҳали Тошкентда ютмаганди. Тарихда биринчи марта сафарда “Пахтакор” устидан ғалаба қозонишга муваффақ бўлди. Ўйиндан олдин рақибни қанчалик ўргангандигангиз?
- Биз рақибни ҳурмат қилган ҳолда ким қанақа ўйнашини қараб чиқдик. Фикримча, бугун тўп назорати кўпроқ “Пахтакор”да бўлди. Бор имкониятдан гол уришга ҳаракат қилдик. Бизга қийинчилик туғдирган нарса биринчи бўлиб гол ўтказганимиз бўлди. Аммо бундай натижа бўлмаслиги керак эди. Футболчиларимиз яхши ўйин кўрсатишганди.
- Нима учундир “Пахтакор”нинг устун тарафлари ва режалари рақибга қарши ўтмаяпти. Ҳолбуки, рақиб ўз режаларини ўтказа оляпти. “Андижон”нинг устун тарафлари – жарима зарбалари, бурчак тўплари ва иккинчи қаватда яхши ўйнайди. Жамоа ўз устунлигини кўрсата олди.
- Биз ҳам бунинг устида ишлаганмиз. Мисол учун, ҳужумда ва ҳимояда қандай ўйнаш борасида ўйлаганмиз. Эътибор берган бўлсангиз, имкониятларимиз кўп бўлди. Фақатгина фарқли томони, рақиб ўз имкониятларидан фойдаланиб кетди.
- Ўйинлардан олдин ҳамкасбингиз билан кўришганда кичкина совға бераяпсиз. Бу нима эканлиги қизиқ...
- Бизда шундай одат борки, меҳмон жамоа келганда қандайдир совға берилади. Чунки бизни стадионга келган рақиб жамоа мураббийига ҳурмат кўрсатиш юзасидан эсдалик учун совға топширамиз.
- Бу асалмиди?
- Асосий нарса, ичида ширинлик нарса ва ёнғоқ бор.
- “Пахтакор”га қарши жамоалар ёпиқ ўйнайди ва темпни пасайтиришга ҳаракат қилади дейиляпти. “Пахтакор” Ўзбекистоннинг гранди клуби бўлгани учун ҳар доим ҳар бир жамоа ўз кучидан келиб чиқиб, бу жамоага қарши ҳимоявий ўйин кўрсатиб келган. Масалан, “Андижон” 10 йил олдин ҳам “Пахтакор”га қарши ҳимоявий ўйнаган. Бу сафар ҳам шундай ўйнаяпти, аммо ютиб кетяпти...
- Рақиб жамоа бизни ҳурмат қилиб кутади. Ёпиқ ўйинларда ҳам улар вазиятларини кутади. Биз ҳам ишлаётганда олдиндаги вазиятларга тайёргарлик кўрамиз, режалаштирамиз. Жамоа ҳам бир ҳафта давомида ишлади, ўзини кўрсата олди, сифатили ўйин кўрсатди. Айрим ўйинчиларимизда жароҳат бор. Тўғрисини айтганда, улар бизга етишмаяпти. Жароҳатланганлар сафга қайтишса, жамоамиз янада кучаяди. Биз ҳаракат қилдик, футболчилар тўпни ўнгдан-чапга узатиб, жой қидиришга ҳаракат қилишди. Бироқ рақиб имкониятларидан фойдаланиб кетди.