Паулу Барбоза: «Роналду ўз меросига ўзи путур етказмоқда»
Португалиялик футбол агенти Паулу Барбоза Португалия терма жамоаси ҳужумчиси Криштиану Роналду ҳақида кескин фикр билдирди.
«Криштиану Роналду — бу муаммо. Афсуски, у аввалги даражасида эмас. У шахсий рекордларини терма жамоа манфаатларидан устун қўймоқда.
Кеча Роналду Жаҳон чемпионатини тарк этди, аммо шунга қарамай, 2028 йилги Европа чемпионатида ҳам ўйнашни хоҳлаётганига ишора қилди. Ҳар қандай буюк футболчи учун фаолиятини якунлаш қийин кечади. Роналду ҳали ҳам ўзини юқори даражада деб ҳисоблайди, лекин бу ундай эмас.
Лионель Месси ҳамон юқори савияда ўйнаяпти, чунки у жамоа учун ҳаракат қилади. Роналду эса буни қилмаяпти.
Роналду ўз меросига ўзи путур етказмоқда. У янги авлодга йўл бериш вақти келганини тушунмаяпти. Энди бошқа футболчилар ўйнаши, жамоада аниқ тизим шаклланиши керак. Катта эго — бу муаммо ва бундай футболчилар учун майдонни тарк этиш ҳар доим қийин бўлади», — деди Барбоза.