«Парма» «Милан»нинг А Сериядаги 24 та ўйиндан иборат мағлубиятсиз сериясига чек қўйди
Италия А Сериясининг 26-турида «Парма» меҳмонда «Милан»ни 1:0 ҳисобида мағлуб этди. Мазкур натижа орқали клуб Массимиано Аллегри шогирдларининг Италия чемпионатидаги 24 та ўйиндан иборат мағлубиятсиз сериясига чек қўйди.
«Милан» сўнгги бор А Сериянинг очилиш турида, ўз майдонида «Кремонезе»га имкониятни бой берган эди (1:2). Ўшандан буён ўтган вақт мобайнида «қизил-қоралар» миллий чемпионатда 15 та ғалаба ва 9 та дуранг қайд этиб, мағлубият нималигини билмай келишаётган эди.
Айни дамда «Милан» 26 та ўйиндан сўнг 54 очко билан турнир жадвалида 2-ўринни эгаллаб турибди. Бироқ, бу мағлубиятдан сўнг жамоа пешқадам «Интер»дан 10 очкога ортда қолмоқда.
Маълумот учун, «россонерилар» ўзининг навбатдаги ўйинини 1 март куни айнан «Кремонезе»га қарши ўтказади. Бу учрашув Аллегри жамоаси учун ўзига хос реванш вазифасини ўташи кутилмоқда.
