«Parma» «Milan»ning A Seriyadagi 24 oʻyindan iborat magʻlubiyatsiz seriyasiga chek qoʻydi
Italiya A Seriyasining 26-turida «Parma» mehmonda «Milan»ni 1:0 hisobida mag‘lub etdi. Mazkur natija orqali klub Massimiliano Allegri shogirdlarining Italiya chempionatidagi 24 o‘yindan iborat mag‘lubiyatsiz seriyasiga chek qo‘ydi.
«Milan» so‘nggi bor A Seriyaning ochilish turida, o‘z maydonida «Kremoneze»ga imkoniyatni boy bergan edi (1:2). O‘shandan buyon o‘tgan vaqt davomida «qizil-qoralar» milliy chempionatda 15 ta g‘alaba va 9 ta durang qayd etib, mag‘lubiyat nimaligini bilmay kelishayotgan edi.
Ayni damda «Milan» 26 ta o‘yindan so‘ng 54 ochko bilan turnir jadvalida 2-o‘rinni egallab turibdi. Biroq, bu mag‘lubiyatdan so‘ng jamoa peshqadam «Inter»dan 10 ochkoga ortda qolmoqda.
Maʼlumot uchun, «rossonerilar» oʻzining navbatdagi oʻyinini 1 mart kuni aynan «Kremoneze»ga qarshi oʻtkazadi. Bu uchrashuv Allegri jamoasi uchun o‘ziga xos revansh vazifasini o‘tashi kutilmoqda.
