Парагвай Жуд Беллингем юзасидан ФИФАга шикоят киритди
Парагвай футбол федерацияси Англия терма жамоаси яримҳимоячиси Жуд Беллингем билан боғлиқ вазият юзасидан ФИФАга расмий шикоят киритди. Шикоят Англия ва Гана ўртасидаги 0:0 ҳисобига якунланган учрашувдан кейин юзага келган.
Парагвай томони Беллингемнинг ўйин давомида оғзини ёпган ҳолда Жордан Айю билан мулоқот қилгани учун жазоланмаганини танқид қилмоқда. Федерация буни янги ФИФА қоидаларининг бир хил қўлланмаганига мисол сифатида кўрсатмоқда.
Эслатиб ўтамиз, аввалроқ Парагвай футболчиси Мигел Алмирон Туркияга қарши учрашувда худди шундай ҳаракат учун қизил карточка олган ва ушбу қоида бўйича жазоланган илк футболчига айланганди.
Бироқ ФИФА ҳакамлар қўмитаси раҳбари Пьерлуижи Коллинанинг тушунтиришига кўра, оғизни ёпишнинг ўзи қоидбузарлик ҳисобланмайди. Жаза фақат можаро, ҳақорат ёки кескин тортишув аломатлари кузатилган ҳолатларда қўлланилади. Беллингем ва Жордан Айю ўртасидаги суҳбат эса ҳакамлар томонидан можароли вазият сифатида баҳоланмаган.
Маълумот учун, ҳозирча ФИФА ушбу шикоят бўйича расмий қарор эълон қилмаган.
