Паоло Мальдини: «Учинчи бор Жаҳон чемпионатисиз қолиш — бу тўлиқ муваффақиятсизлик»
Италия миллий жамоасининг собиқ ҳимоячиси Паоло Мальдини миллий жамоанинг ЖЧ-2026 саралашидаги омадсизлигидан сўнг ўзининг кескин муносабатини билдирди. Эслатиб ўтамиз, италияликлар плей-офф босқичининг ҳал қилувчи баҳсида Босния ва Герцеговинага имкониятни бой бериб, кетма-кет учинчи бор мундиалдан қуруқ қолишди.
«Италия миллий жамоаси либосини кийганингда, қалбда фахр ва улкан тарихий масъулиятни ҳис қилишинг керак. Бу шунчаки жамоа эмас, балки футбол тарихидаги энг буюк термалардан бири. Битта Жаҳон чемпионатини ўтказиб юбориш — бу хавфли сигнал, иккитаси — инқироз, учтасини эса аллақачон тўлиқ муваффақиятсизлик ҳисобланади», — дейди Мальдини.
Афсонавий ҳимоячи ҳозирги авлоднинг руҳияти ҳақида ҳам тўхталиб ўтди:
«Бизнинг давримизда иқтидор қадрланарди, аммо характер ва ғолиблик менталитети доим биринчи ўринда турган. Интизом, фидойилик ва эмблема олдидаги ҳурмат — бу ўзгармас қоида эди. Бугун мен ғалабага бўлган аввалги интилишни кўрмаяпман. Терма жамоа либоси учун борини беришга тайёр футболчиларни кўрмаяпман. Босниядан учралган мағлубият шунчаки тасодифий натижа эмас, балки чуқурроқ муаммонинг инъикосидир. Ўзлигини, ғурурини ва масъулиятини йўқотган Италия — энди Италия эмас».
Маълумот ўрнида, Паоло Мальдини 1988 йилдан 2002 йилга қадар Италия миллий терма жамоаси шарафини ҳимоя қилган ва жамоанинг ҳақиқий рамзларидан бири ҳисобланади.
