Паоло Мальдини Буффонни Италия терма жамоасига қайтармоқчи
Италия футболи афсонаси Паоло Мальдини терма жамоани қайта қуриш лойиҳасида собиқ дарвозабон Жанлуижи Буффон билан яна бирга ишлашни истамоқда. Бу ҳақда Италия ОАВлари хабар берди.
Маълумотларга кўра, яқинда Италия футбол федерациясининг техник директори этиб тайинланган Мальдини, Буффонни федерация таркибидаги муҳим лавозимлардан бирига қайтариш тарафдори. У Буффоннинг тажрибаси ва етакчилик фазилатлари Италия футболини тиклаш жараёнида катта фойда келтиришига ишонмоқда.
Эслатиб ўтамиз, Буффон 2026 йил баҳорида Италия терма жамоаси кетма-кет учинчи марта Жаҳон чемпионатига чиқа олмаганидан сўнг, федерациядаги лавозимини тарк этган эди.
Қайд этилишича, Мальдини бошчилигидаги янги лойиҳа Италия футболини ислоҳ қилиш ва 2030 йилги Жаҳон чемпионатига кучли жамоа шакллантиришни мақсад қилган. Буффоннинг ушбу лойиҳада иштирок этиши борасида музокаралар давом этмоқда.
