Пакета “Ливерпуль”га қарши ўйинда бир дақиқа ичида иккита сариқ карточка олди
“Вест Хэм” яримҳимоячиси Лукас Пакета кеча Англия чемпионати доирасидаги “Ливерпуль”га (0:2) қарши ўйинда яна бир можароли вазият марказида қолди.
83-дақиқада мерсисайдликлар фойдасига 1:0 ҳисоб қайд этилган пайтда марказда қоида бузилди. “Вест Хэм” футболчиси рақибга нисбатан қўполлик қилгач, ҳакам ўйинни тўхтатди. Эпизодда иштирок этмаган Пакета эса ҳакам томонга қўлларини кўтарганча норозилик билдира бошлади. Арбитр билан баҳслашгани учун бразилиялик футболчига дарҳол сариқ карточка кўрсатилди.
Бироқ Пакета бунга қарамай тинчимади — у фаол имо-ишоралар билан ҳакамга эътироз билдиришда давом этди. Ҳакам бир муддат ундан узоқлашишга ҳаракат қилди ва иккинчи карточкани кўрсатмади. Аммо бразилиялик ўйинчининг босими ортиб боргач, арбитр ниҳоят иккинчи сариқни чўнтагидан чиқариб, Пакетани майдондан четлатди.
Эслатиб ўтамиз, аввалроқ Пакета атайлаб карточкалар олиб, букмекерлик баҳсларига аралашганликда айбланган эди, бироқ кейинчалик у бу ишда айбсиз деб топилган.
