«Пахтакор FM» 2026 йилдан эътиборан Пролигада иштирок этади
«Пахтакор» клуби қошидаги фарм жамоа Қибрайдаги футбол базасида жойлашган стадион капитал таъмирдан чиққунга қадар ўз уй учрашувларини «Пахтакор» стадионида ўтказиш, шунингдек, Пролига регламентида акс этган барча талабларни бажариш учун кафолат берди.
Маълумки, фарм жамоа таркибида рўйхатдан ўтган футболчи Суперлига ва U21 чемпионатида иштирок эта олмайди. Жамоа таркибида ўзини кўрсатган футболчи фақатгина даврлар оралиғида асосий жамоага жалб этилиши мумкин. Шунингдек, клубнинг Пролига жамоасида рўйхатдан ўтказилаётган футболчиси билан тузиладиган меҳнат шартномаси Биринчи лига мусобақасиникидан фарқ қилади.
«Пахтакор» футбол мактабидан етишиб чиқаётган футболчиларнинг нисбатан яхшироқ мусобақа ва стадионларда тўп тепиши, шунингдек, Суперлига учун даъвогар клубларга қарши ўйинларда майдонга тушиши инобатга олиниб, клуб раҳбарияти шундай қарорга келди.
