Олизе фаолиятини «Реал Мадрид»да давом эттирмоқчи
Мюнхеннинг «Бавария» клуби вингери Майкл Олизе келажакда фаолиятини Испания чемпионатида давом эттиришга қизиқиш билдирмоқда. Хабарларга кўра, франциялик футболчи учун «Реал Мадрид» энг жозибадор вариантлардан бири ҳисобланади. Бу ҳақда журналист Кристиан Фалк хабар бермоқда.
Манбага кўра, Мадрид клуби Олизени трансфер қилиш имкониятини ўрганишда давом этмоқда. Аввалроқ «Реал» футболчига бўлган қизиқишидан воз кечгани ҳақида хабарлар тарқалган эди. Бироқ Фалкнинг таъкидлашича, мадридликлар вингернинг вазиятини кузатишни тўхтатмаган.
«Бавария» эса футболчи билан шартномани узайтириш орқали унинг келажагига ойдинлик киритишни истамоқда. Агар Олизе янги келишувга имзо чекса, «Реал Мадрид»нинг уни сотиб олиш имконияти камайиши мумкин. Шу билан бирга, «Манчестер Сити» ҳам футболчига қизиқиш билдириши эҳтимоли мавжуд.
Маълумот учун, 24 ёшли Майкл Олизе 2024 йилда Лондоннинг «Кристал Пэлас» клубидан «Бавария»га ўтган. Франциялик вингер Мюнхен жамоасининг асосий футболчиларидан бирига айланган. Ҳозирча унинг трансфери юзасидан расмий музокаралар бошлангани маълум эмас.
