«Ньюкасл» Яйссле учун «Ал-Аҳли»га 11 миллион евро тўлайди
Англиянинг «Ньюкасл» клуби янги бош мураббий тайинлаш арафасида.
Инсайдер Фабрицио Романонинг X ижтимоий тармоғида маълум қилишича, клуб Саудия Арабистонининг «Ал-Аҳли» жамоасига бош мураббий Маттиас Яйссле учун 11 миллион евро миқдорида товон пули тўлайди.
Манбага кўра, 38 ёшли германиялик мутахассис билан 2030 йил ёзигача амал қиладиган шартнома имзоланади.
Шунингдек, Яйссле 1 август, шанба куни «Ньюкасл»нинг янги бош мураббийи сифатида расман таништирилиши кутилмоқда.
Аввалроқ «Ньюкасл»нинг собиқ бош мураббийи Эдди Хау раҳбариятни фаолиятида танаффус қилиш нияти ҳақида хабардор қилиб, ўз лавозимини тарк этгани маълум қилинган эди.
Маттиас Яйссле «Ал-Аҳли»ни 2023 йил ёзидан буён бошқариб келмоқда. Унинг Саудия клуби билан амалдаги шартномаси яна бир йилдан кейин ўз якунига етади.
