«Ньюкасл» Вольтемаденинг жамоадаги келажаги бўйича бир қарорга келди

“Ньюкасл” клуби раҳбарияти ҳужумчи Ник Вольтемадени жамоада сақлаб қолишга қарор қилди. Бу ҳақда The Telegraph хабар берди.

Манбага кўра, клубда 24 ёшли форвард Англия Премьер-лигаси талабларига мослашиб бўлганига ишонч билдирилмоқда ва у келаси мавсумда анча яхши натижалар кўрсатиши кутилмоқда. Мураббийлар штаби немис футболчисининг машғулотлардаги ишини ижобий баҳоламоқда ҳамда уни ҳужумчи ортида ўйнайдиган позицияда очилиши мумкин деб ҳисобламоқда.

Жорий мавсумда Вольтемаде Премьер-лигада 32 та ўйинда иштирок этиб, 8 та гол ва 3 та голли узатма муаллифига айланган.

Эслатиб ўтамиз, 2025 йил ёзида “Ньюкасл” уни “Штутгарт”дан 85 миллион евро ва бонуслар эвазига харид қилган эди. Ушбу трансфер клуб тарихидаги энг қиммат келишув бўлиб қолмоқда.

Розикжон Султонмуродов

Журналист