Новак Жокович Монтекарлодаги «Masters» турнирини ўтказиб юборади
«Катта дубулға» тоифасидаги турнирларнинг 24 карра ғолиби, дунё рейтингининг учинчи рақамли теннисчиси Новак Жокович Монтекарлода бўлиб ўтадиган «Masters» мусобақасидан чиқиб кетди. Бу ҳақда турнир матбуот хизмати хабар бермоқда.
«Новак Жокович турнирда иштирок этишдан воз кечди. Биз унга энг эзгу тилакларимизни йўллаймиз ва тез орада кортда кўришга умид қиламиз», — дейилади турнир матбуот хизмати баёнотида.
Сербиялик теннисчи 2011 йилдан буён илк бор ушбу турнирни ўтказиб юбормоқда. Аввалроқ, Жокович ўнг елкасидаги жароҳати сабабли Майами (АҚШ)даги «Masters»да ҳам иштирок эта олмаган эди.
Монтекарло «Masters» турнири 5 апрелдан 12 апрелга қадар бўлиб ўтади. Мусобақанинг амалдаги чемпиони испаниялик Карлос Алкарас ҳисобланади. Ўтган йилги финалда у италиялик Лоренцо Музеттини (3:6, 6:1, 6:0) мағлуб этган эди.
