Нойер «Кёльн»га қарши баҳсда жароҳат олган
Мюнхеннинг «Бавария» клуби ўзининг X ижтимоий тармоғида жамоа дарвозабони ва сардори Мануэль Нойерда мушак билан боғлиқ муаммо юзага келгани ҳақида маълум қилди.
Клуб баёнотида айтилишича, 40 ёшли голкипер ҳозирда чап оёқ болдир мушакларидаги муаммо сабаб енгил режимига амал қилиши керак. Буни «Бавария» тиббий штаби тасдиқлаган. Нойер шанба куни Бундеслига доирасида «Кёльн»га қарши уй учрашувининг 60-дақиқасида майдонни тарк этган.
15 май, жума куни «Бавария» Мануэль Нойер билан шартномани 2027 йил ёзига қадар узайтирганини эълон қилган эди.
Жорий мавсумда дарвозабон барча мусобақаларда 37 та ўйинда майдонга тушиб, уларнинг 11 тасида ўз дарвозасини дахлсиз сақлаб қолган. Transfermarkt маълумотига кўра, футболчининг бозор қиймати 4 миллион еврога баҳоланмоқда.
