Нико О’Райли Англия терма жамоаси қароргоҳини тарк этди
Англия терма жамоаси ҳимоячиси Нико О’Райли «Манчестер Сити» ихтиёрига қайтди. Футболчи жароҳат олган ва Миллатлар лигасида Англия терма жамоасининг қолган учрашувларида иштирок эта олмайди. Бу ҳақда talkSPORT хабар берди.
Аввалроқ 21 ёшли О’Райли 2:0 ҳисобида Англия ғалабаси билан якунланган Чехияга қарши учрашувни ўтказиб юборган эди. Ундан олдин Испанияга қарши баҳсда (2:3) футболчи тўлиқ ўйин ўтказган, шундан сўнг индивидуал дастур асосида машғулот қилган.
О’Райли шанба куни Хорватияга қарши ўйинда, шунингдек, уч кундан кейин бўлиб ўтадиган Чехияга қарши иккинчи учрашувда иштирок этмайди. Футболчи жароҳатининг жиддийлик даражасини аниқлаш учун қўшимча текширувдан ўтиш мақсадида клубига қайтди.
О’Райли Англия терма жамоасининг Миллатлар лигасидаги ўйинлари учун дастлабки таркибидан чиқиб кетган олтинчи футболчи бўлди. Аввалроқ Коул Палмер, Деклан Райс, Маркус Рэшфорд, Кобби Майну ва Тино Ливраменто жамоа ихтиёрини тарк этган эди.
Маълум бўлишича, бош мураббий Томас Тухель О’Райлининг ўрнига бошқа футболчини терма жамоага чақирмайди.
