Нидерландия ўз тарихида тўртинчи бор мундиал ўйинида 5 та гол урди
Футбол бўйича 2026-йилги Жаҳон чемпионати «F» гуруҳи 2-турида Нидерландия миллий терма жамоаси Швецияни 5:1 ҳисобида тор-мор этди. Шу тариқа, «оловранглилар» ўз тарихларида тўртинчи бор Жаҳон чемпионатлари доирасидаги битта учрашувда рақиб дарвозасига 5 та гол уришга муваффақ бўлишди. Бу ҳақда Opta Analyst таҳлилий саҳифаси X ижтимоий тармоғида хабар бермоқда.
Ушбу ғалабадан сўнг Нидерландия очколари сонини 4 тага етказиб, «F» гуруҳи турнир жадвалида якка пешқадам бўлиб олди. Мағлубиятга учраган Швеция эса 3 очко билан ҳозирча иккинчи ўринда бормоқда. Гуруҳнинг қолган икки вакили — Япония (1 очко) ва Тунис (0 очко) бўлиб, улар ҳали 2-тур учрашувини ўтказишгани йўқ.
Эслатиб ўтамиз, гуруҳ босқичининг 1-турида Нидерландия Япония билан жанговар дуранг қайд этган (2:2), Швеция эса Тунисни йирик ҳисобда таслим этган эди (5:1). Гуруҳнинг ҳал қилувчи сўнгги турида нидерландлар Тунис билан, шведлар эса Япония терма жамоасига қарши майдонга тушишади. Мазкур ўйинларнинг иккаласи ҳам 26-июн куни бўлиб ўтиши белгиланган.
Мундиалнинг гуруҳ босқичи баҳслари 11-июндан 27-июнга қадар давом этади. Мусобақа регламентига кўра, ҳар бир гуруҳдан дастлабки икки ўринни эгаллаган жамоалар ҳамда учинчи ўринни банд этган энг яхши 8 та терма жамоа плей-офф йўлланмасига эга чиқади.
