Niderlandiya o‘z tarixida to‘rtinchi bor mundial o‘yinida 5 ta gol urdi
Futbol bo‘yicha 2026-yilgi Jahon chempionati «F» guruhi 2-turida Niderlandiya milliy terma jamoasi Shvetsiyani 5:1 hisobida tor-mor etdi. Shu tariqa, «olovranglilar» o‘z tarixlarida to‘rtinchi bor Jahon chempionatlari doirasidagi bitta uchrashuvda raqib darvozasiga 5 ta gol urishga muvaffaq bo‘lishdi. Bu haqda Opta Analyst tahliliy sahifasi X ijtimoiy tarmog‘ida xabar bermoqda.
Ushbu g‘alabadan so‘ng Niderlandiya ochkolari sonini 4 taga yetkazib, «F» guruhi turnir jadvalida yakka peshqadam bo‘lib oldi. Mag‘lubiyatga uchragan Shvetsiya esa 3 ochko bilan hozircha ikkinchi o‘rinda bormoqda. Guruhning qolgan ikki vakili — Yaponiya (1 ochko) va Tunis (0 ochko) bo‘lib, ular hali 2-tur uchrashuvini o‘tkazishgani yo‘q.
Eslatib o‘tamiz, guruh bosqichining 1-turida Niderlandiya Yaponiya bilan jangovar durang qayd etgan (2:2), Shvetsiya esa Tunisni yirik hisobda taslim etgan edi (5:1). Guruhning hal qiluvchi so‘nggi turida niderlandlar Tunis bilan, shvedlar esa Yaponiya terma jamoasiga qarshi maydonga tushishadi. Mazkur o‘yinlarning ikkalasi ham 26-iyun kuni bo‘lib o‘tishi belgilangan.
Mundialning guruh bosqichi bahslari 11-iyundan 27-iyunga qadar davom etadi. Musobaqa reglamentiga ko‘ra, har bir guruhdan dastlabki ikki o‘rinni egallagan jamoalar hamda uchinchi o‘rinni band etgan eng yaxshi 8 ta terma jamoa pley-off yo‘llanmasiga ega chiqadi.
