Неймар дубль қайд этиб, «Сантос»ни мағлубиятдан қутқарди
Бразилия чемпионатининг 29-туридан ўрин олган «Сантос» ва «Фламенго» ўртасидаги баҳс 2:2 ҳисобида якунланди.
Учрашувда меҳмонлар Данило ва Лукас Пакета томонидан киритилган голлар эвазига икки тўп фарқи билан олдинга чиқиб олди. Голлардан бирига собиқ ЦСКА ва «Динамо» футболчиси Хорхе Карраскаль голли узатма билан ҳисса қўшди.
Иккинчи бўлимда захирадан майдонга тушган Неймар икки марта пенальтини аниқ амалга ошириб, «Сантос»га ҳисобни тенглаштиришга ёрдам берди.
Шу тариқа, «Сантос»нинг кетма-кет бешта ғалабадан иборат сериясига чек қўйилди. Жамоа 42 очко билан турнир жадвалининг саккизинчи ўрнида бормоқда. «Фламенго» эса 61 очко билан пешқадамликни сақлаб қолди.
Неймар Бразилия чемпионатининг жорий мавсумида 13 та учрашувда майдонга тушиб, саккизта гол урди ва учта голли узатмани амалга оширди.
