Нефчининг Анталия шаҳрида ташкил этилган икки босқичли ўқув-йиғин машғулотлари ўз ниҳоясига етди
3-январдан 20-январгача давом этган биринчи босқич ҳамда 24-январдан 17-февралгача бўлиб ўтган иккинчи босқич орқали жамоамиз янги мавсум олдидан пухта тайёргарлик жараёнини тўлиқ якунлади.
Бош мураббий Исломбек Исмоилов ва мураббийлар штаби томонидан ишлаб чиқилган режа асосида футболчилар кунига икки маҳалдан машғулотларда иштирок этишди. Машғулотлар асосан тактик ишланмалар, ўйин схемаларини мукаммаллаштириш, жисмоний ҳолатни яхшилаш ҳамда аналитик таҳлиллар асосида камчиликларни бартараф этишга қаратилди. Жараён юқори интизом, профессионал ёндашув ва ижобий муҳитда кечди.
Назорат учрашувларида эса машғулотларда ишлаб чиқилган тактик ғоялар ва схемаларни амалийотда синовдан ўтказишга алоҳида эътибор қаратилди. Жамоамиз йиғин давомида жами 9 та назорат ўйинида майдонга тушиб, шулардан 6 тасида ғалаба қозонди ва 3 учрашувда мағлуб бўлди. Бу натижалар тайёргарлик жараёнининг самарали ўтганини кўрсатади.
Йиғин давомида 30 нафар футболчи майдонга чиқди, уларнинг 11 нафари ёш иқтидор эгалари экани алоҳида эътиборга лойиқ. Бу эса жамоамизда соғлом рақобат ва келажак учун мустаҳкам заҳира шаклланаётганидан далолат беради.
Шу тариқа, Анталияда ўтган йиғин машғулотлари муваффақиятли якунланди ва жамоамиз бугун Ўзбекистонга қайтмоқда. Энди асосий эътибор расмий учрашувларга қаратилди.
