«Napoli» президенти Антонио Контенинг Италия миллий жамоасига қайтишига қаршилик қилмайди — манба
«Napoli» клуби президенти Аурелио Де Лаурентис жамоа бош мураббийи Антонио Контенинг Италия миллий терма жамоасидаги фаолиятини қайта тиклаши бўйича ўз розилигини билдирди. Бу ҳақда La Gazzetta dello Sport нашри хабар бермоқда.
Клуб раҳбарияти тажрибали мутахассиснинг миллий жамоа бошқарувига тайинланишига тўсқинлик қилмоқчи эмас. Таъкидлаш жоизки, Контенинг неаполликлар билан амалдаги шартномаси 2027 йилга қадар мўлжалланган бўлиб, у ўтган мавсумда жамоа билан биргаликда Италия чемпионлигини қўлга киритган эди.
Антонио Конте муқаддам 2014–2016 йиллар давомида Италия терма жамоасини бошқарган. Унинг қўл остида «Скуадра Адзурра» Евро-2016 мусобақасининг чорак финалига қадар етиб борган эди.
Италия терма жамоаси ЖЧ-2026 саралашининг ҳал қилувчи плей-офф босқичида Босния ва Герцеговинага имкониятни бой бергач (1:1, пенальтилар бўйича 1:4), бош мураббий Женнaро Гаттузо ўз лавозимини тарк этди. Ушбу мағлубият натижасида Италия кетма-кет учинчи бор Жаҳон чемпионатисиз қоладиган бўлди.
Маълумот ўрнида, 2026 йилги Жаҳон чемпионати келаси йилнинг ёзида АҚШ, Канада ва Мексика майдонларида бўлиб ўтади. Мусобақанинг амалдаги ғолиби Аргентина терма жамоаси ҳисобланади. Эслатиб ўтамиз, 2022 йилги мундиал финалида аргентиналиклар Франция билан дуранг ўйнаб (3:3), пенальтилар сериясида (4:2) ғалаба қозонишган эди.
