«Napoli» prezidenti Antonio Kontening Italiya milliy jamoasiga qaytishiga qarshilik qilmaydi — manba
«Napoli» klubi prezidenti Aurelio De Laurentis jamoa bosh murabbiyi Antonio Kontening Italiya milliy terma jamoasidagi faoliyatini qayta tiklashi bo‘yicha o‘z roziligini bildirdi. Bu haqda La Gazzetta dello Sport nashri xabar bermoqda.
Klub rahbariyati tajribali mutaxassisning milliy jamoa boshqaruviga tayinlanishiga to‘sqinlik qilmoqchi emas. Ta’kidlash joizki, Kontening neapolliklar bilan amaldagi shartnomasi 2027 yilga qadar mo‘ljallangan bo‘lib, u o‘tgan mavsumda jamoa bilan birgalikda Italiya chempionligini qo‘lga kiritgan edi.
Antonio Konte muqaddam 2014–2016 yillar davomida Italiya terma jamoasini boshqargan. Uning qo‘l ostida «Skuadra Adzurra» Yevro-2016 musobaqasining chorak finaliga qadar yetib borgan edi.
Italiya terma jamoasi JCh-2026 saralashining hal qiluvchi pley-off bosqichida Bosniya va Gersegovinaga imkoniyatni boy bergach (1:1, penaltilar bo‘yicha 1:4), bosh murabbiy Jennaro Gattuza o‘z lavozimini tark etdi. Ushbu mag‘lubiyat natijasida Italiya ketma-ket uchinchi bor Jahon chempionatisiz qoladigan bo‘ldi.
Ma’lumot o‘rnida, 2026 yilgi Jahon chempionati kelasi yilning yozida AQSH, Kanada va Meksika maydonlarida bo‘lib o‘tadi. Musobaqaning amaldagi g‘olibi Argentina terma jamoasi hisoblanadi. Eslatib o‘tamiz, 2022 yilgi mundial finalida argentinaliklar Fransiya bilan durang o‘ynab (3:3), penaltilar seriyasida (4:2) g‘alaba qozonishgan edi.
