Мюллер: «Мессининг ҳозирги ўйин услуби ЖЧ-2026да иш берадими ёки йўқ, билмайман»
Германиялик футболчи Томас Мюллер Лионель Мессининг 2026 йилги Жаҳон чемпионатида иштирок этиш эҳтимоли ва унинг Аргентина терма жамоасига таъсири ҳақида фикр билдирди.
Айни пайтда Аргентина терма жамоаси етакчиси Месси мундиалда ўйнашини расман тасдиқлагани йўқ. 38 ёшли ҳужумчи бугунга қадар беш марта Жаҳон чемпионатида қатнашган бўлиб, 2022 йилда ушбу турнирда ғолиб чиққан.
«Агар у Жаҳон чемпионатида ўйнаса, бу жуда қизиқарли бўларди. Бу кучлар нисбатига сезиларли даражада ўзгариш киритиши мумкин. Бироқ бу Аргентина терма жамоасини кучлироқ ёки аксинча, кучсизроқ қиладими — бунга аниқ ишончим йўқ.
Мен Мессига MLS финалида қарши ўйнаганман — у тўпни қабул қилган пайтларда дарҳол жонланиб кетарди. Тўғри позициялар эгаллаган ҳолда ҳужумдаги ҳаракатларни ўзи бошлаб берарди. Аммо унинг ҳозирги ўйин услуби халқаро футболнинг энг юқори даражасида қай даражада самарали бўлишига ишончим комил эмас. Шундай бўлса-да, Аргентина менинг назаримда чемпионликка асосий даъвогарлар қаторида юқори ўринда туради», — дея Мюллернинг сўзларини келтиради Yahoo Sports.
