«МЮ» скаутлари Калулунинг ўйинини кузатиш учун «Милан» — «Ювентус» ўйинига ташриф буюришни режалаштирмоқда
Англиянинг «Манчестер Юнайтед» клуби скаутлари А Серия 34-тури доирасидаги «Милан» ва «Ювентус» ўртасидаги учрашувга ташриф буюришни режалаштирмоқда. Уларнинг мақсади туринликлар марказий ҳимоячиси Пер Калулунинг ўйинини кузатишдан иборат. Бу ҳақда TuttoMercatoWeb нашри хабар бермоқда.
Жамоалар якшанба, 26 апрель куни Миландаги «Сан-Сиро (Жузеппе Меацца)» стадионида тўқнаш келишади.
Манба берган маълумотларга кўра, «Ювентус» француз футболчиси билан шартномани узайтириш ва унинг маошини оширишни режалаштирмоқда, бироқ «Манчестер Юнайтед» бу жараёнга аралашиб, келишувни йўққа чиқариши мумкин.
Хабар қилинишича, потенциал трансфер суммаси «Ювентус» ҳимоячи учун «Милан»га тўлаган маблағдан сезиларли даражада фарқ қилади. Ўтган йилнинг ёзида туринликлар Калулунинг трансфери учун 14 миллион евро тўлашган эди.
