«МЮ» Алекс Скотт учун курашмоқда, аммо «Борнмут» юқори нарх талаб қилмоқда
«Манчестер Юнайтед» «Борнмут» ярим ҳимоячиси Алекс Скоттни ўз сафига қўшиб олишга қизиқиш билдирмоқда. Бу ҳақда Mirror нашри хабар тарқатди.
Манба маълумотига кўра, «қизил иблислар» 22 ёшли англиялик футболчи учун тахминан 47 миллион евро таклиф қилишга тайёр бўлган. Бироқ «Борнмут» ўз футболчисини 82 миллион евродан кам маблағга сотишни истамаяпти.
Хабар қилинишича, «Манчестер Юнайтед» раҳбарияти ушбу баҳони ҳаддан ташқари юқори деб ҳисобламоқда ва айни вақтда бошқа муқобил вариантларни ҳам ўрганмоқда.
Шу билан бирга, Алекс Скоттга Лондоннинг «Арсенал» клуби ҳам қизиқиш билдирмоқда ва у трансфер учун даъвогарлардан бири ҳисобланади.
Алекс Скотт ўтган мавсум барча мусобақаларда 39 та учрашувда майдонга тушиб, 4 та гол урди ва 1 та голли узатма амалга оширди.
Футболчининг «Борнмут» билан амалдаги шартномаси 2028 йил ёзига қадар амал қилади. Transfermarkt маълумотига кўра, унинг бозор қиймати ҳозирда 50 миллион еврога баҳоланмоқда.
