Мунозара. \"Челси\" мухлисига \"МЮ\"чилардан жавоб
Дўстимиз "Манчестер Юнайтед" ҳақида қизиқарли ва ўринли фикрларни билдириб ўтди. Унинг гапларида жон бор, лекин..
Аввало, "Юнайтед"чилар "Челси"нинг Жозе Моуриньо давридаги жамоасини ҳурмат қилади. Ўшанда клуб ҳақиқатда кучли футболчиларни жамлай олган ва бунга европада ҳам кўрсата олган эди. "Челси"нинг "қутириб кетиши" ва "Юнайтед"га зўр рақобатчи бўлиши футбол дунёйси учун катта фойда бўлгани табиий. Бежизга фикримни Моуриньо давридан бошламадим, худди Ферги вақти бўлганидек, "Челси" ҳам фантастик даврларни бошидан ўтказган. Буни тан оламиз.
Ҳеч нарса абадий эмас. Ҳар бир клубда ўсиш ва пасайиш даври бўлади. Агар футбол бир жойда қотиб қолса, яъни фақат бир хил клублар чемпион бўлаверса унда бу жозибадор ўйин ривожланишдан ва ўзига хос рақобатдан тўхтаб қолганини билдирди. Яхшиямки, ундай эмас. Ҳар йили зўрдан зўр чиқаверади. Масалан "Ливерпул" Англия чемпионлигини неча йиллар давомида кутганини ва ниҳоят бунга эришганини биласиз. "Арсенал" ҳам шундай ҳолатда, "тўпчилар" узоқ йиллардан бери чемпион бўла олишмаяпти, лекин тинимсиз ҳаракатда эканлигини кўриб, сезиб турибмиз. Лондонликлар куни кеча "Реал"ни, 15 карра чемпионлар лигаси ғолибини мусобақадан чиқариб юборгани ҳам бунга яққол мисол бўла олади. “Ньюкасл” ҳам ниҳоят узоқ кутилган кубокни қўлга киритди. Ўзимиздан эса "Нефтчи" ва "Навбаҳор" каби клубларни узоқ йиллардан бери чемпион бўла олмаяпганини, ёки "Андижон" тарихда илк бор пойтахтда "Пахтакор"ни мағлуб қилганини мисол қилиб келтириш мумкин.
"Манчестер Юнайтед" ҳам 2013 йилдан бери ҳар хил яхши-ёмон кунларни бошидан ўтказиб келмоқда. Тўғри ўша шонли пайтларда "қизил иблислар" шаънини ҳар бир лаҳзада ҳимоя қила оладиган ғурури баланд, керак бўлса муштлашишга ҳам тайёр турадиган қаҳрамон футболчилари бор эди. Жамоа шунчалик аҳл ва "ваҳший" эдики, бу ҳолатни ҳатто сиз айтган "галлактикос"дан ҳам топиб бўлмас эди.
Лекин, Криштиану Роналду айтганидек: "замон ўзгарди", афсуски шундай. Клубнинг структураси ҳам базаси ҳам ҳамма ҳаммаси эскирди.
Авваллари "Юнайтед"нинг ипига игнасича Фергюсоннинг ўзи назорат қилар эди. Фергюсон яратган тизим зўрлигини ҳаммамиз тан оламиз, лекин у кетганидан кейин ҳаммаси парча-парча бўлиб кетди. Клубда менежмент умуман нол ҳолатига тушиб қолди, ўз анъаналаридан воз кечди. Янги ёш иқтидорларни қидириб топиб, уларни юлдуз қилиш билан эмас, балки, юлдуз ёки сўнаётган футболчилар билан шартнома имзолаб, миллиардлаб пулларни ҳавога совуришдан бошқасини билмасдан қолди. Тинимсиз мураббий алмаштиришлар-у, охирги пайтлардаги пул тежаш учун қилинаётган "жинниликлар" буларнинг барчаси клубни таназзулга учрашуга сабаб бўлди. Натижани эса жадваллардан кўришингиз мумкин.
Энди кечаги ўйинга қайтсак. Албатта кеча "Юнайтед" мухлислари ўша Ферги даврини эсга олиб, кўзларига ёш келган бўлса ажабмас. Тан олиш керак, "Манчестер" ҳозир олдингидек топ жамоа эмас, шунчаки ўртамиёна клубга айланиб қолган. Биласизми, тўзғиб ётган бундай даврда кечаги ғалаба ҳам ширин татиди, ишонинг. Қолаверса бу жуда муҳум ғалаба эди, нега дейсизми? Ҳозир изоҳлайман. АПЛ жадвалида 14 ўринни эгаллаб турган ва чемпионшипни ҳиди келиб ётган бир вақтда, УЕФА чемпионлар лигаси йўлланмасини қўлга киритиш ва европа лигаси совринини боши узра баланд кўтариш имкониятини сақлаб қолиш учун камбек амалга оширган бўлса, бундан нега завқланмаслик керак? Ҳаттоки, рақиб "Шўртан" бўлганида ҳам худди шундай бўлар эди. Хулоса шуки, "МЮ" бир кун келиб яна олдинги даражасига қайтади, бунинг учун эса тўғри менежмент ва вақт керак бўлади. Унгача эса сабр қилиб турамиз.
Айтганчи, "Челси" ҳеч бўлмаса европа лигасида ҳам кўринмаяпти-я, а лаббай?
