Мудрик тез орада майдонга қайтиши мумкин — манба
Лондоннинг «Челси» клуби украиналик вингери Михаил Мудрик яқин орада дисквалификациядан сўнг майдонга қайтиши мумкин. Бу ҳақда The Chelsea Forum фан-аккаунти хабар берган.
Маълум қилинишига, футболчи яна «кўклар» жамоаси таркибига киритилиши мумкин. Клубда унинг формасини тиклаш бўйича йўллар муҳокама қилинмоқда: вариантлардан бири — Мудрикни Франциянинг «Страсбург» клубига ижарага бериш, бу ерда у ўйин амалиётини ошириб, ишончни қайтариши мумкин. Ижаранинг якунида «Челси» раҳбарияти унинг келажаги бўйича — жамоада қолдириш ёки трансферга чиқариш ҳақидаги якуний қарорни қабул қилади.
Ўтган мавсумда Мудрик клуб даражасида 15 ўйинда майдонга тушиб, 3 та гол урди ва 5 та самарали узатмани амалга оширди. Олдинроқ футболчининг танасида допинг моддаси аниқлангани сабабли у ноаниқ муддатга футболдан четлатилган эди.
Қайд этиш жоиз, ушбу фан-аккаунт клубнинг энг машҳурларидан бири ҳисобланади. Унга 200 мингдан ортиқ киши обуна бўлган, жумладан нуфузли журналистлар ҳам бор. Айнан шу аккаунт манбалари Энцо Маресканинг бош мураббийлик лавозимидан кетиши ҳақида биринчи бўлиб хабар берган эди.
