Муҳаммад Исаев: «Саралашда қайси жамоаларга қарши ўйнашимиздан қатъий назар, гуруҳ босқичига чиқиш асосий вазифамиз ҳисобланади»
«Гулистон» футбол клуби эртага, 22-март куни Ўзбекистон кубоги саралаш 1-босқич доирасида «Sonyc X» билан куч синашади. Бу ўйин олдидан жамоамиз етакчи футболчиларидан бири Муҳаммад Исаев фикрларига қизиқдик.
«Мавсумга босқичма босқич яхши тайёргарлик кўрдик. Ҳозир жисмоний ҳолатимиз анча яхшиланди. Шу йиғин давомида кўпгина назорат ўйинларида қатнашдик. Бу орқали жамоавий ўйинимиз шаклланди. Эртанги илк расмий баҳсимизга 100 фоиз тайёрмиз.
Кубок саралаш ўйинидаги илк рақибимиз «Sonyc X» жамоаси медиа бўлишига қарамай, профессионал ўйинчилардан ташкил топган. Улларда тажрибали мураббий бор. Битта ўйиндан иборат эканлиги сабабли ижобий натижа учун ҳаракат қиламиз. «Гулистон» футбол клуби олдига юқори вазифа ва мақсадлар қўйилган. Саралаш босқичида кимга қарши ўйнашимиздан қатъий назар фақат ғалаба учун курашамиз. Мақсадимиз битта – Ўзбекистон кубоги гуруҳ босқичига йўлланма олиш. Турнирда Суперлига ва Про лига жамоаларига қарши ўйнаб, Сирдарё вилоятига катта футбол ҳавосини қайтармоқчимиз», — деди Исаев клуб матбуот хизматига.
