Моуриню «Реал» президентига трансферлар рўйхатини топширди
Мадриднинг «Реал» клуби бош мураббийлигига тайинланишга яқин турган португалиялик мутахассис Жозе Моуриню клуб президенти Флорентино Перес учун жамоада кўришни истаган футболчилари рўйхатини тайёрлади. Шундай ўйинчилардан бири «Вест Хэм» яримҳимоячиси Матеуш Фернандеш ҳисобланади. Бу ҳақда AS нашри хабар бермоқда.
Манбанинг келтиришича, Лондон клуби 21 ёшли футболчини 80 миллион фунт стерлингга (92 миллион евро) баҳоламоқда. Шу билан бирга, португалиялик яримҳимоячига «Арсенал» ва «Ливерпуль» клублари ҳам даъвогарлик қилмоқда.
Ортда қолган мавсумда Фернандеш барча мусобақаларда жами 42 та ўйинда майдонга тушиб, 5 та гол ва 5 та голли узатмани ўз ҳисобига ёздириб қўйди. Футболчининг клуб билан амалдаги меҳнат шартномаси 2030 йилнинг ёзигача мўлжалланган. Transfermarkt портали тақдим этган маълумотларга кўра, ярим ҳимоячининг бозор қиймати 50 миллион еврога тенг.
