Моуринью: “Мен ‘Барселона’да таржимон бўлмаганман”
Мадриднинг “Реал” клуби бош мураббийи Жозе Моуринью фаолиятининг “Барселона”даги даврини эслаб, ўша пайтда Бобби Робсоннинг таржимони бўлган деган қарашларга муносабат билдирди. Португалиялик мутахассис 1996–2000-йиллар оралиғида Каталония клуби мураббийлар штабида ишлаган.
Моуриньюнинг айтишича, у инглиз тилини яхши билгани сабаб кўпчилик уни Робсоннинг таржимони деб ҳисоблаган. Бироқ мураббий бу фикрга қўшилмайди ва унинг вазифаси бундан анча кенг бўлганини таъкидлаган.
“‘Барселона’да инглиз тилида эркин гапира оладиган ягона одам бўлганим, мен таржимон бўлиб ишлаганман дегани эмас. Мен Бобби Робсоннинг таржимони эмас, кўпроқ унинг ёрдамчиси эдим”, дея Моуриньюнинг сўзларини келтиради манба.
Португалиялик мутахассис “Барселона”даги фаолиятидан сўнг 2000-йилда мустақил мураббийлик фаолиятини бошлаган ва “Бенфика”ни бошқарган. Кейинчалик Моуринью Европа футболининг энг таниқли мураббийларидан бирига айланди.
