Моуриньо “Реал”га Бастонини олиб келмоқчи бўлган
Мадриднинг “Реал” клуби бош мураббийи Жозе Моуриньо ёзги трансфер ойнасида “Интер” марказий ҳимоячиси Алессандро Бастонини жамоага олиб келишни истаган. Италиялик футболчи португалиялик мутахассиснинг ҳимоя чизиғини кучайтириш учун асосий номзодларидан бири бўлган. Бу ҳақда Diario AS хабар берди.
Манбага кўра, “Интер” 27 ёшли ҳимоячисини 70 миллион евродан камига сотишни истамаган. Бастонининг ўзи ҳам Милан клубини тарк этишга шошилмаган. Шу сабаб трансферни амалга ошириш “Реал” учун мураккаблашган.
Бироқ битим амалга ошмай қолишининг яна бир муҳим сабаби Ибраима Конатенинг “Реал”га келиши бўлган. Франциялик ҳимоячи “Ливерпуль” билан шартномаси якунлангач, мадридликлар сафига эркин агент сифатида қўшилди. Бундан ташқари, Рауль Асенсионинг клубда қолиши “Реал”нинг яна бир марказий ҳимоячи харид қилиш режасини тўхтатган.
Маълумот учун, Бастони “Интер” сафида кетма-кет тўққизинчи мавсумини ўтказмоқда. У 2025/26 йилги Италия чемпионатида 28 та учрашувда майдонга тушиб, битта гол урган. Энди ҳимоячи Чемпионлар Лигасида Моуриньо бошчилигидаги “Реал”га қарши “Сантьяго Бернабеу”да майдонга тушади.
