Моуриньо “Реал” машғулотларида Луис Энрике усулидан фойдаланишни бошлади
“Реал Мадрид” бош мураббийи Жозе Моуриньо машғулотларда янги технологик усулдан фойдаланишни бошлади. Португалиялик мутахассис Вальдебебасдаги машғулот майдонига улкан экран ўрнатиб, футболчиларга тактик кўрсатмаларни бевосита майдоннинг ўзида тушунтирмоқда. Бу ҳақда AS нашри хабар бермоқда.
Манбага кўра, экранда жамоанинг тактик схемалари, турли ўйин вариантлари, эпизодларнинг анимациялари ва бўлажак рақиблар таҳлили намойиш этилади. Шундан сўнг футболчилар кўрсатилган вазиятларни майдонда дарҳол амалда бажариб кўришади. Бу усул Моуриньога ўз талабларини жамоага тезроқ ва аниқроқ етказиш имконини бермоқда.
Мазкур ёндашув Луис Энрике қўллайдиган машғулот усулларига қиёсланмоқда. Испаниялик мутахассис аввал машғулотларни баландроқ нуқтадан кузатиш учун махсус конструкциядан фойдаланган бўлса, ҳозир ПСЖда катта экранлардан ҳам фойдаланмоқда. Моуриньо эса шу ғояни “Реал”даги машғулотларга мослаштирган.
Маълумот учун, “Реал” футболчилари янги усулни ижобий қабул қилган. Клуб ичида бундай машғулотлар тактик маълумотларни ўзлаштиришни енгиллаштираётгани ва жараённи янада динамик қилаётгани қайд этилган.
