Морган Роджерс “Челси”даги янги ўйин услубига мослашиши кераклигини айтди
“Челси” ярим ҳимоячиси Морган Роджерс янги жамоасининг ўйин услубига мослашиш жараёни ҳақида фикр билдирди. Англиялик футболчининг айтишича, “Астон Вилла”даги футбол ва “Челси”нинг майдондаги ёндашуви бир-биридан сезиларли даражада фарқ қилади.
Роджерс “Астон Вилла”да Унай Эмери футболчиларнинг кучли томонларидан унумли фойдаланишга катта эътибор қаратганини таъкидлади. Унинг сўзларига кўра, бирмингемликлар қарши ҳужумлар, бўш ҳудудлардан фойдаланиш ва вертикал футболга кўпроқ таянарди. “Челси”да эса техник жиҳатдан кучли футболчилар кўп ва жамоа тўп назоратига кўпроқ урғу беради.
24 ёшли футболчи янги жамоасида сабр билан ҳаракат қилиш, тўпни қабул қилиш учун керакли вазиятни кутуш ва бўш ҳудуд кам бўлган учрашувларда ўз кучли томонларини бошқача намоён этишни ўрганиши кераклигини қайд этди. Роджерс буни футболчи сифатида ривожланишнинг муҳим қисми деб ҳисоблашини ва турли рақибларга қарши самарали ўйнай оладиган универсал футболчига айланишни исташини билдирди.
Маълумот учун, Морган Роджерс 2026 йил ёзида “Астон Вилла”дан “Челси”га 117 миллион фунт эвазига кўчиб ўтди ва британиялик футболчилар орасидаги трансфер рекордини янгилади. У Лондон клуби билан 2033 йилгача шартнома имзолаган. Роджерс “Челси” сафидаги дебют учрашувида “Реал Сосьедад” дарвозасини ишғол қилишга ҳам муваффақ бўлди.
