Модрич ЖЧ-2026дан кейин фаолиятини якунлашга тайёр

У «Реал Мадрид»да иш бошлаши мумкин.

Футбол Бугун да 04:38

Розикжон Султонмуродов

Журналист

Хорватиялик ярим ҳимоячи Лука Модрич 2026 йилги жаҳон чемпионатидан сўнг футболчилик фаолиятини якунлашга тайёр. Бу ҳақда инсайдер Николо Скира ижтимоий тармоқ орқали хабар берди.

Манбага кўра, 40 ёшли футболчи фаолиятини тугатгач, «Реал Мадрид» клубида лавозимлардан бирини эгаллаши борасида келишувга эришган.

Модрич 2012–2025 йиллар давомида «Реал» шарафини ҳимоя қилди. Бу вақт ичида у тўрт карра Испания чемпиони ва олти карра УЕФА Чемпионлар лигаси ғолиби бўлди. 2018 йилда ярим ҳимоячи «Олтин тўп»ни қўлга киритиб, ушбу мукофотга сазовор бўлган илк хорват футболчисига айланди.

Хорватия терма жамоаси 2026 йилги жаҳон чемпионатида L гуруҳида Англия, Панама ва Гана жамоаларига қарши баҳс олиб боради. Хорватлар ва инглизлар ўртасидаги учрашув 16 июн кунига белгиланган.

Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.