Модрич «Реал»га қайтиши мумкинлиги ҳақидаги хабарларга изоҳ берди
«Милан» яримҳимоячиси Лука Модрич ўзининг «Реал»га қайтиши мумкинлиги ҳақидаги миш-мишларга муносабат билдирди. 40 ёшли хорват футболчиси ўтган йилнинг июн ойида мадридликлар сафини тарк этиб, эркин агент сифатида Италия клубига кўчиб ўтган эди.
Шунингдек, матбуотда «Реал» жорий мавсум якунида «Милан» бош мураббийи Массимилиано Аллегрини ўз клубига таклиф қилиши мумкинлиги ҳақида хабарлар тарқалди.
Madrid Xtra ижтимоий тармоғи орқали Модричнинг бу борадаги фикрлари келтирилди:
«Аллегрининг ва менинг «Реал»га ўтишимизми? Миш-мишлар доимо бўлади, лекин бу мени қизиқтирмайди. Мен «Милан»да жуда бахтлиман».
Жорий мавсумда тажрибали ярим ҳимоячи барча мусобақаларда 30 та ўйинда майдонга тушиб, 2 та гол урди ва 3 та голли узатмани амалга оширди. Модричнинг «Милан» билан шартномаси мавсум якунга қадар мўлжалланган, бироқ футболчининг хоҳишига кўра у автоматик равишда яна бир йилга узайтирилиши мумкин.
