Модрич «Милан»га шарт қўйди
Машҳур журналист Жанлука Ди Марзио ўз сайтида «Милан»нинг 40 ёшли яримҳимоячиси Лука Модрич қандай шартлар асосида Италия клубидаги фаолиятини давом эттириши мумкинлигини очиқлади.
Инсайдер берган маълумотларга кўра, хорватиялик футболчи «Милан»ни А Серия турнир жадвалининг юқори поғоналари учун кураша оладиган ва Чемпионлар Лигасида мунтазам иштирок этадиган рақобатбардош жамоа сифатида кўришни истамоқда. Бундан ташқари, тажрибали яримҳимоячи «россонерилар» бош мураббийи Массимилиано Аллегри ўз лавозимида қолишидан умидвор.
2025/2026 йилги мавсумда Модрич клуб сафида барча турнирлар доирасида 34 та учрашувда майдонга тушиб, 2 та гол урди ва 3 та голли узатмани амалга оширди.
Ҳозирги вақтда «Милан» 63 очко билан Италия чемпионати турнир жадвалида учинчи ўринни эгаллаб турибди. Лигада 75 очко тўплаган «Интер» пешқадамлик қилмоқда.
