MLS комиссияри: «Агар Салоҳ MLSга ўтишни истаса, биз уни мамнуният билан қабул қиламиз»
MLS комиссияри Дон Гарбер «Ливерпуль» юлдузи Муҳаммад Салоҳнинг лига клубларига келиб қўшилиши эҳтимоли борлиги ҳақида фикр билдирди. У мисрлик вингернинг MLSда ўйнашини мамнуният билан кутиб олишларини айтди.
«Агар Салоҳ қачондир MLSга ўтишни истаса, биз уни мамнуният билан қабул қиламиз.
Мен унга Лео Месси ва Томас Мюллер билан гаплашишни маслаҳат берган бўлардим — улар MLSда ўзларини қай даражада бахтли ва муваффақиятли ҳис қилаётгани, бу лигада тўп суриш қандай кечаётгани ҳақида айтиб беришади.
Мен Салоҳ бўйича баъзи миш-мишларни эшитдим. Биз шартномаларнинг дахлсизлигини жуда қадрлаймиз — бу Америка бизнес-маданиятининг бир қисмидир. Муҳаммаднинг «Ливерпуль» билан амалдаги шартномаси бор, биз ўша ерда ишлайдиган одамларни яхши танидамиз. Бу — ажойиб жамоа», — дея Гарбернинг сўзларини келтиради Goal.
Сўнгги ҳафталарда 33 ёшли Салоҳ бир неча учрашувни захирада бошлади. «Лидс» билан 3:3 ҳисобидаги дурангдан сўнг у клуб ва бош мураббий Арне Слотни кескин танқид қилган эди. Шундан кейин у УЕФА Чемпионлар Лигасидаги «Интер»га қарши ўйин учун (1:0) қайдномага киритилмади.
Аввалроқ мисрлик футболчи MLSнинг «Сан-Диего» ёки «Чикаго Файер» клубларига ўтиши мумкинлиги ҳақида хабарлар тарқалган эди.
