Мирзиёев Фарғона вилояти футбол ассоциацияси футбол маркази ҳамда «Нефтчи» болалар футбол академиясига ташриф буюрди
Президент Шавкат Мирзиёев Фарғона вилояти футбол ассоциациясига қарашли футбол маркази ва “Нефтчи” болалар футбол академиясида яратилган шарт-шароитлар билан танишди.
Фарғона вилояти ўзининг бой футбол анъаналари ва истеъдодли чарм тўп усталари билан машҳур.
Жумладан, 1962 йилда ташкил этилган «Нефтчи» футбол клуби Ўзбекистон Суперлигасининг 6 карра чемпиони, мамлакат кубогининг 2 карра ва суперкубокнинг 1 карра соҳиби ҳисобланади. Шунингдек, клуб 1994 йилда МДҲ кубоги финалчиси бўлган, 1994-1995 йилларда эса Осиё чемпионлар лигасида бронза медалларини қўлга киритган.
Бугунги кунда ҳам ҳудудда иқтидорли ёш футболчиларни саралаб олиш ҳамда тайёрлаш, малакали мураббийлар захирасини яратиш бўйича тизимли ишлар амалга оширилмоқда.
Хусусан, профессионал футбол клублари академияларини ривожлантиришга қаратилган чоралар самарасида 2025 йилда “Нефтчи” болалар футбол академияси ташкил этилди.
4,5 гектардан ортиқ майдонни эгаллаган академия 150 нафардан зиёд ўқувчи-ёшлар учун мўлжалланган. Бу ерда 6 та катта ва кичик футбол майдони, замонавий тиббий ва реабилитация ускуналари билан жиҳозланган физиотерапия бўлими фаолият юритади.
Академияда 1,1 миллион долларлик сунъий қопламали, ҳаво гумбаз билан ёпилган ёпиқ футбол манежи қурилган.
Вилоятда футбол муҳитини жаҳон стандартлари даражасига чиқариш, иқтидорли ёшларни саралаш мақсадида УЕФА инструкторлари ва бошқа халқаро мутахассислар жалб қилинган.
Президентимиз академияда футболчилар учун яратилган шарт-шароитлар билан яқиндан танишди. Ёшлар билан суҳбатлашиб, уларнинг машғулот жараёнларини кузатди.
