Мирко Йеличич: «Ёш футболчилар янада кўпроқ ишлашлари керак»
Про-лиганинг 6-туридан ўрин олган "Локомотив" - "Олимпик" (2:0) учрашувидан кейин “Олимпик” устози Мирко Йеличич матбуот анжуманида иштирок этди.
"Ўйин яхши ўтди. Рақиб кўпроқ босим қилди, тўп назорати ҳам улар томонида бўлди. Бизга тажриба етишмади", - деб гап бошлади Йеличич.
- Иккинчи ўтказилган голда дарвозабон хатолик қилди. Учрашув давомида у яхши ўйнаганди, бу хатога нима сабаб бўлди деб ўйлайсиз?
- Тўғриси, ўша голни кўрмадим, захирадан футболчи туширишга тайёрланаётгандим. У ёш посбон, тажриба кам, консентрация етишмади. Энг яхши дарвозабонлар ҳам хатолик туфайли гол ўтказишади. Футболда кўп нарсани миллисонялар ҳал қилади. Миллисоняга консентрацияни йўқотсанг, хатолик қиласан ва гол ўтказиб юборасан.
- 6 та тур ортида қолди, "Олимпик" сиз кутган футболни намойиш этаяптими?
- Йигитлар ўз вазифаларини билиб олишган. Албатта ёшлар билан ишлашда вақт керак. 4 ой кам муддат. Ёш футболчилар янада кўпроқ ишлашлари керак.
